Psalmet 138

Psalm i Davidit.

Do të të falënderoj me gjithë zemër,

para hyjnive për ty do të këndoj.

Do të përkulem drejt tempullit tënd të shenjtë

dhe emrin tënd do të përlëvdoj

për mirësinë e besnikërinë tënde,

sepse emrin tënd dhe fjalën tënde

i ke lartësuar mbi gjithçka.q

Ditën që të thirra, më dëgjove,

shpirtit tim i dhe guxim e fuqi.

Gjithë mbretërit e tokës do të të përlëvdojnë, o Zot,

se i kanë dëgjuar fjalët e gojës sate.

Do të këndojnë për udhët e Zotit:

«E madhe është lavdia e Zotit!».

I lartë është Zoti, por të përulurin e shikon,

ndërsa kryelartin e dallon nga larg.

Edhe po të kaloj përmes fatkeqësisë,

ti do të më mbash gjallë kundër zemërimit të armiqve,

do ta shtrish dorën dhe e djathta jote do të më shpëtojë.

Zoti do të përmbushë gjithçka për mua.

Zot, mirësia jote mbetet në amshim,

nga veprat e duarve të tua mos hiq dorë!


 q138.2 të tjerë: e madhërove fjalën tënde më shumë se emrin tënd